اصل مش لازم تكزنى احلى بنت فى الدنيا مش لازم تكونى زى ما الناس عيزاكى تبقى مينفعش حياتك كلها تبقى زى ما ناس تانية عيزاها تبقى مش لازم تكزنى اذكى واحدة ولا لازم تكزنى كاملة اصل مفيش حد كامل !
ربنا خلق كل واحد فينا فيه عيبو حاجة نقصاه عشان مع بعض كل واحد بيستحمل التانى و بيكمله لو كل واحد فينا كان كامل مكناش هنبقى عايزين نبقى مع بعض :)
فمتحاوليش تغيرى فنفسك او تبقى زى ما حد عايزك تكونى مش هتستفادى غير انك هتخسرى نفسك و شخصيتك و احلامك عشان فمكان فى الدنيا دى نصك التانى موجود فيه بصك الى بيكملك الانسان الى هيستحمل اى حاجة منك و انتى هتستحمليه عشان انتوا بتكملوا بعض و هيبقى عايزك زى ما انتى كده بشكلك و بكلامك و ضحكتك و حتى حاجات الطفولة الى جواكى هيحبها و هيبقى عايز يرجعلك طفولتك تانى معاه عشان هيبقى عايزك تبقى زى بنته و تحسى بالامان .
متتعبيش نفسك و توجعى قلبك و تدى حبك لناس متستاهلهوش و افضلى زى ما انتى و حققى الى تتمنيه و الانسان الصح الى هيحافظ عليكى هيجى فى الوقت الصح و المكان الصح و معااه كل حاجة هيبقى ليها احساس تانى عشان مهما كانت الدنيا فيها حاجات بتوجع و وحشة لكن لما تبقى قوية و مع حد بيحبك كل حاجة ممكن تتحل عشان طول ما انتى عايشة و عارفة انك اميرة اكيد هتلاقى امير :) .

طب هو ازاى ممكن تبص لحد بتحبه و متقدرش تعيش من غيره و تقول لنفسك خلاص الوقت جه عشان امشى بس مش امشى و ارجع كمان شوية لا امشى خالص و ابعد !
حد اتعودت انه موجود ديما فى حياتك و كل حاجة بتعملها بتبقى مستنى تكلمه عشان تحكيهاله حد فى عينك حاجة غير كل الناس الى موجودة فى الدنيا هو الى مخليك عايز تعيش حد قدامك حاجات كتير ممكن تعكلها و تشغلك عنه بس انت بتختار تبقى معاه هو و بتسامحه على اى حاجة طب ازاى ممكن تبقى بتحب حد كده و تقول انك خلاص عايز تبعد ؟
الاستغراب ملوش لازمة دلوقتى عشان لما حد يتغير معاك اووى و يبطل يتعامل معاك زى الاول و حتى ميبقاش عنده سبب للتغير ده و لما يحسسك انك خلاص بقيت زيك زى اى حد فى حياته و فجاه كل حاجة تهون عليه و عند اى مشكله اسهل حل عنده ان يبعد يبقى اه من حقك تبصله و تقول انا خلاص مش راجع :)
اصله لو كان بيحبك بجد مكنش اتغير معاك او حتى لو اتغير كان حاول يرجع نفسه للاحسن تانى ده لو بجد عايز يكمل اصل الى عايز يعمل حاجة بيعملها لو بيحبك كان فضل بجد يعاملك زى اول ما عرفتوا بعض مش عشان خلاص بقى مطمن انك مش هتبعد يبقى يتصرف زى ما هو عايز لو كان بيحبك كان اهتم بجد و بقيت اهم حاجة فى حياته لو بيحبك كانت دموعك هتبقى غالية عنده و عمره ما كان هيفكر فى البعد .
طب هو فى بجد ناس بتتغير كده !
طب اتغيروا ولا هما كانوا اصلا كده و كانوا بيمثلوا ؟
اسالة كتيرة ملهاش اجابة بس الحقيقة ان :
الناس بتتغير .

• الصحاب الى عاملين نفسهم صحاب لما بتحتاجهم مش بتلاقيهم .
• حاجات كتير اوى فى الحياه بتبقى عايزها تكون صح بس بتروح طريق غلط .
• الحب مش دايما حلو و كتير بيوجع .  

بس اهم حاجة لازم تفتكرها ان الدنيا بتمشى و حياتك مش هتقف على حد .

الدنيا لو جارحة لونها لون فرحة

اجمل احساس فى الدنيا دى ممكن تحسه انك تبقى فرحان و مبسوط من قلبك بجد احساس ناس كتير ممكن تكون بطلت تحسه من المشاكل و هموم الدنيا بس دى مش اسباب تخليك تبطل تفرح من قلبك بجد .

اصل الفرحة انت ممكن تلاقيها فاقل حاجة فضحكة بيبى صغير طالعة ببراءة فموقف حصل معاك من زمان و فجاة افتكرته و ضحكت هتلاقى الفرحة فى ضحكة بين اتنين بيتخنقوا و نسوا بعدها الخناقة فى ضحكها بتضحكها مع بباك لما يقفش عليك و تلاقيه ضحك معاك هتلاقيها فاغنية بتتكلم عن الفرحة سمعتها فحسيت انك مبسوط او الضحك الكتيير الى بتضحكه فى لمتك وسط صحابك او اهلك طب هو فى اكتر من فرحة و احساس بالامان لما تبقى بين ايدين ربنا و انت بتصلى و تدعيله و انت ساجد و دعوتك تتحقق .

اصلها مش محتاجة تفكير و حسابات ده هى ضحكة هتحل مشاكلك مش مستاهلة تكبر المواضيع و تكشر انت بس اضحك و الدنيا هتضحكلك و طول ما انت متفائل كل حاجة هتتحل سبها على ربنا و اضحك و افرح من قلبك و فرح الناس معاك دى ضحكة ممكن تفرح الى قدماك و تبسطه .

خليها على ربنا و اضحك :)

http://www.youtube.com/watch?v=FVKPx6Hs6Wc

الحب

الحب مش كلمة زى اى كلمة عادية بتتقال !
الحب ده دنيا بتتعاش ممكن تطلع بيك لسابع سما او تنزلك لسابع ارض اصل دى حاجة بتتولد جواك من اول ما تيجى الدنيا دى مع اول مشاعر حب بتحسها مع مامتك لما بتلمسك بايديها وتهتم بيك و لما تفضل راحتك على راحتها و مع الوقت بتبتدى تحب اى حد يلعب معاك وانت صغير او يجبلك حاجة حلوة .
حبك لاخواتك لما بتهزروا مع بعض و اللمة بتاعت كل يوم .
لحد ما بيجى عليك وقت بتحس ان مشاعر الحب العادية الى كنت بتحسها كل يوم ابتدت تتغير و بتاخد طريق تانى لما بتشوف بنت او ابن الجيران او زميلتك فى الدرس مع اول نظرة عين و دقة قلب بتحس ان كل حاجة ابتدت تتغير و مبتبقاش فاهم فى ايه !
المشكلة بقى ان ساعات كتيير ده مبيبقاش حب و حتى لو كان كده معظم الوقت كل حاجة مبتبقاش كويسة عشان فى ناس كتير اووى نسيت يعنى تحب .
اصل بحبك دى مش كلمة تتقال عادى كده دلوقتى الولد بقى يقولها لمليون بنت فى اليوم و هو مبيبقاش حاسسها اصلا و البنات برده للاسف مش فاهمين ان الكلمة دى بتغير حياة الى قدامهم مجرد انك تسمعها بتحس انها اخدتك لدنيا تانية دنيا كل حاجة فيها جميلة ممكن تبقى للى بيقولها كلمة تافهة من 4 حروف لكن للى بيسمعها بتبقى الكلمة الى كان مستنى يسمعها عشان تفرحه و تخده لدنيا بعيدة زى الوعد بظبط فى ناس لما بتوعد مبتبقاش عارفة ان الى بسمع الوعد بيبنى حياته عليه .
الحب مش انكوا تهزروا شوية و تضحكوا على بعض بكلمتين ده احساس بيغيرك من جوه لما تبقى خايف على حد اوووى من قلبك و تتطمن عليه كل شوية و لما مجرد ما تسمع اسم زى اسمه تلاقى نفسك بتبتسم و تفتكره لما متبقاش شايف غيره و زعله عندك حاجة كبيرة اووى لما متقدرش تنام و انت مزعله لما تبقى خايف من الفراق و مستعد تعمل اى حاجة عشان تفضلوا مع بعض لما تتهتم و تثبت حبك بجد بالافعال اصل الحب مش كلام و اهم حاجة انك تحافظ على الى بتحبه اكتر من نفسك حتى و تعمل اى حاجة هتفرحه حتى لو صغيرة اووى .
قلوب الناس مش لعبة عشان ممكن حد بسببك يبطل يثق فاى حد تانى و يبطل يحب و حياته كلها هتدمر و اهم حاجة تبقى عارف انه كما تدين تدان فمتعملش فحد حاجة مترضاش انها تتعمل فيك او  فحد عزيز عليك لمجرد انك بتتسلى او بتلعب .

الخوف

انك تبقى خايف مش معناه انك جبان زى ما معظم الناس بتقول على اى حد لما يقول انه خايف من حاجة اول كلمة بتتقاله انه جبان !

بس احنا كلنا بنخاف كل واحد بيبقى جواه حاجة خايف منها ممكن يكون بيقولها لحد او حاجة محدش يعرفها غيره عشان ببساطة خايف يقول انه خايف فى الى خايف من انه يحب و الى خايف ان حبيبه يسيبه و الى خايف من كلام الناس و الى خايف من ربنا و الى خايف من انه يموت اسباب الخوف بتختلف لكن فالاخر اسمه خوف .

لما بتبقى خايف ساعات بتحس ان خوفك ده بيعطلك و بيخليك واقف مكانك مبتتحركش و ساعات الخوف بيخلى الانسان عايز يوصل لهدفه و يهزم خوفه و يحقق حلمه .

الخوف ممكن يحطم حياتك و يدمرها و ممكن ينقذك من حاجات كتير وحشه ممكن تحصلك زى واحد بيخاف يمشى فشارع ضلمة برغم ان الشارع ده هيوصله لبيته بسرعة اوى بس بياخد الطريق الطويل المنور ممكن واحد هيقول عليه جبان بس لو فكر هيلاقى ان اه الشارع الضلمة هيوصله بسرعة بس ممكن حرامى يطلع يسرقه او اى حاجة تحصله .

اوعى تكدب و تقول انك مش خايف من حاجة عشان اكيد كلنا خايفين من بكرة من المستقبل من حاجات خايفين انها تضيع مننا من حاجات عايزين نوصلها و مش عارفين هنوصل ولا ؟

مش عيب انك تخاف العيب انك تخلى خوفك يدمرك و انه يبقى اقوى منك قول لنفسك انا اه خايف من كذا بس مش هسيب خوفى يبقى اقوى منى لو خايف حاجة تضيع منك حافظ عليها و اعمل كل حاجة عشان تخليها معاك عشان مترجعش تقول يارتنى عملت كده عايز حاجو و خايف متوصلهاش ادعلى ربنا و قوله يارب ساعدنى و اجتهد و ابقى قد المسؤلية و ربنا هيقف جمبك عيش كل يوم اكنه هيبقى اخر يوم هتعيشه متنمش و انت حاسس انك مقصر فحاجة او ان نفسك فحاجة و خايف تعملها مين عارف مش يمكن ميبقاش فى بكره !

الخوف ده مجرد احساس لكن الانسان هو الى يقدر يتغلب عليه او يسيب خوفه ياثر عليه .

اه انا خايفة و حاسه انى ضعيفة بس عمرى ما هستسلم لخوفى او اسيب حاجة تكسرنى ^_^